Der Ratscher

Am Anfang geht’s a wengerl zach oo im Neien Johr. Aber des werd scho nu. Muasst dann schon zuadoa, wennst dir was vorgnumma host. Ned nur oiwei red’n, doa muasst scho a wos.

Im Sommer macht di da Neptun a bisserl damisch. Schaust hoid genau hi, wennst a Neie/n kennalernst. Manchmoi kennst di nämlich dann gor nimmer recht aus.

Trau’n duast da wos und zum sog’n host aa oiwei wos. Herst di hoid a furchtbar gern selber red’n. Sitz‘t di am besten amoi alloa wo hi und sinnierst, wos dir wirklich wichtig is. Wennst glücklich sei megst, muasst auf dei Herzerl hör’n. Dei Kopf hätt oiwei was zum meld’n.

Furtfahrn kannst aa im Sommer, gfoit dir g’wiss. Derfst aa weider weg fahr’n, wenn’st mogst. Packelst di z’amm und dahi geht’s. Nimmst mit, wos’d kriagst. So jung kemma nimma z’amm.

©Andrea Angermeier